Rusiye quvetçileri Qırımnıñ Canköy rayonınıñ sakinini, telegramda Keriç köprüni yoq etmege çağıruv ile yazğan tefsiri içün apiske aldı. Bu aqta Rusiye kütleviy haber vastaları Rusiye Federal havfsızlıq hızmetiniñ Qırım ve Aqyar idaresiniñ matbuat hızmetine atıf etip bildire.
Berilgen malümatqa köre, 1976 senesi doğğan erkekke qarşı Rusiye Federatsiyası Ceza kodeksiniñ 205.2 maddesiniñ 2-nci qısmına istinaden cinaiy dava açıldı (İnternet informatsion-telekommunikatsion ağını qullanıp, terroristik faaliyetni kerçekleştirmege çağıruvlar).
Rusiye quvetçileri erkekniñ ne yazğanını ve qaysı toplulıqta olğanını aytmaylar. Tutulğan kişiniñ adı ve soyadı aydınlatılmay, onıñ açıq izaatları da yoq. Eger qabaatı isbatlansa, oña 7 yılğa qadar apis cezası berile bile.
Daa evel Ukrayina prezidentiniñ Qırım Muhtar Cumhuriyetindeki temsilciligi, Roskomnadzor Rusiye Federatsiyası tarafından işğal etilgen Ukrayina topraqlarında, şu cümleden Qırımda, informatsion boşluq üzerinde nezaretni quvetleştire, dep bildirdirgen edi.
Berilgen malümatqa köre, Rusiye müessisesi internet provayderleriniñ internet ağına qoşulğan bütün cihazlarnıñ IP-adresleri, geolokatsiya malümatı, ağğa kiriş içün qullanılğan bütün cihazlarnıñ identifikatorları, qullanılğan programma teminlevi ve internet-trafik aqqında malümatnı toplap, Roskomnadzorğa bermesini közde tuta.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.