2025 senesiniñ yazında rusiyeliler işğal etilgen Qırımda qanunsız arheologik qazmalarnı faalleştirdiler, Rusiye Federatsiyasından student ve alimlerni celp ettiler. Bu aqta ilk yaz ayınıñ 18-nde Qırımtatar resurs merkezi haber etti.
Rusiye kütleviy haber vastaları "Akra, Artesian ve Hersones" ekspeditsiyaları aqqında açıqtan-açıq yazalar.
Hususan, Rusiye ilimler akademiyasınıñ Maddiy medeniyet tarihı İnstitutınıñ baş ilmiy hadimi Viktor Vahoneyevniñ malümatına köre, Keriç yarımadasına Belgorod universitetiniñ studentleri qadimiy yunan Aqradan qazma işleri içün kelmeli.
Aynı zamanda, antik Artezian şeerinde Moskva ve Moskva civarındaki aliy oquv yurtlarınıñ iştiragi ile daa bir ekspeditsiya başlandı. Rusiye akimiyeti bu sene eñ azından 12 qazma işini planlaştıra, şu cümleden Qırımnıñ Yedi Quyu rayonınıñ Yakovenkov rayonında da.
Bundan da ğayrı, büyük "teşkerüvler" "Tavrik Hersones" müzey-qoruğında devam ete. QRM-niñ yazğanına köre, anda medeniy qatlamlar yoq etilgeninden, artefaktlar Rusiye Federatsiyasına çıqarılğanından ğayrı, qazma yerinde açıq teatr da quruldı.
"2025 senesi çeçek ayında ukrayin müzey fondlarından hırsızlanğan neolitik timsalleri olğan muqaddes eşyalarnıñ yañı ekspozitsiyası açıldı", — dep yaza QRM.
Mında qırımtatar medeniyetiniñ abideleri de yoq etilgenini qayd ettiler. Meselâ, Aqmescitte rusiyeliler Kalğa sultanınıñ sarayını yoq ettiler ve Meñli Geray camisiniñ temelini bozdılar. Qırımtatar resurs merkeziniñ ekspertleriniñ aytqanına köre, Bağçasaraydaki Han Sarayınıñ uzun müddetli "restavratsiyası" onıñ UNESCO miras obyekti statusından marum ete bile.
Aq qorçalayıcılar qayd etkenine köre, böyle areketlernen rusiyeliler halqara uquqnı boza.
Qırımtatar resurs merkezi böyle faktlarnıñ qayd etilmesiniñ müimligini qayd etti ve halqara toplulıqnı "Qırımda ukrayin ve qırımtatar halqlarınıñ medeniy mirasınıñ sistematik yoq etilmesini toqtatmaq içün" kirişmege çağıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
