Kıyivdeki Ğrışko Milliy nebatat bağçasında "Krayina mriy" halqara etnofestivalinde ilk yaz ayınıñ 20-22 künleri Lavanda tarlası değ adlandırılğan Qırım sanası çalışacaq. Bu aqta prezidentniñ Qırım Muhtar Cumhuriyetindeki temsilciligi bildirdi.
Qayd etilgenine köre, tedbir qırımtatar muzıkasını, edebiyatını, ananelerini, bala ve tasil programmalarını, em de Qırım ve onıñ sakinlerine qol tutuv timsallerini birleştirmek kerek..
Üç kün devamında festival musafirleri qırımtatar artistleri — Aziza Eskender, Cemil Karikov, Ismail Kurt-Umer ve Shopping Hour Grp, Sivaş stantsiyası taqımlarınıñ çıqışlarını seyir ete, lektsiyalarnı, munaqaşalarnı diñley, tedqiqatçılar, ressamlar ve aq qorçalayıcılar iştiraginen kitap ve videolektsiyalarnıñ taqdimlerini seyir ete bilecekler.
Bundan da ğayrı, etnofestival çerçivesinde masal, oyun ve qırımtatar tili dersleri ile balalar alanı çalışacaq.
Festival çerçivesinde qırımlı siyasiy mabüsler ile birdemlik aktsiyaları, "Serbest Qırımğa mektüpler", fotoresim sergileri keçirilecek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
