Rusiye esirliginden ağır hasta ukrayin arbiyleriniñ gruppası qaytarıldı, dep bildire cenk esirleri ile munasebet meseleleri koordinatsion ştabı ilk yaz ayınıñ 19-nda.
Bugünki deñişim devamında İstanbulda añlaşılğanı kibi "ağır hastalar ve yaralanğanlar" kategoriyasından esirlerni azat etmege imkân oldı.
"Cenk esirleri ile munasebet meseleleri koordinatsion ştabı Ukrayina prezidentiniñ emrinen yaralanğan ve ağır sağlıq problemleri olğan qoruyıcılar taqımını azat etti", — dep aytıla haberde.
Ukrayin ştabınıñ malümatına köre, Ukrayina Silâlı quvetleriniñ arbiy hızmetçileri, şu cümleden Arbiy-deñiz quvetleri, Desant-ücüm orduları, Territorial mudafaası quvetleri, em de Ukrayina Devlet sıñır hızmeti ve Milliy gvardiyasınıñ vekilleri evlerine qayttı. Er biriniñ yaralanması ve esirlikte bulunması neticesinde ağır tibbiy diagnoz ve hastalıqları bar, dep qoşa müessise.
Azat etilgenlerniñ çoqusı üç yıldan ziyade esirlikte tutuldı. Ştabnıñ qayd etkenine köre, olarnıñ çoqusı Mariupol mudafaasında esir alındı. Er kes azat etilgen adiy asker ve serjantlar, Donetsk, Luğansk, Herson, Harkiv, Sumı, Çerniğiv, em de Zaporojjâ ve Kıyiv vilâyetlerinde cenkleştiler.
Koordinatsion ştabı iş devam etkenini ve yaqın vaqıtta esirlerni deñişüvniñ nevbetteki basamağını azırlağanını qoşa.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
